يوميات بنت مصريه عايزه تتجوز2

المدير العام 868 23/05/2009

2 يوميات بنت مصريه عايزه تتجوز

البت نهى اتخطبت....

لقد...نزل...علينا...الخبر....كالصااااااااااااعقة

البت السهنة ..ولا تقول و لاحسينا بيها..ولاسمعنالها لا حس و لاخبر..قال ايه نسيبها يوم نيجي التاني نلاقيها دخلالنا و واقفة في وسط الصيدلية و هووب رفعتلنا ايديها اليمين و الدبلة بتلمع فيها
مش تباركولي يا جماعة انااتخطبت
الصيدلية اللي كانت في حالة حركة فجأة كل حاجة فيها وقفت في مكانها زي ماتكون بتتفرج على شريط فيديو و هنج فجاة عشان الهيد عايز يتمسح..كل حاجة وقفت حتى المرضى على الشباك وقفوا و بحلقوا و هما مش فاهمين" كأنهم بيقولوا"الجماعة دول ممكن حد فيهم يتخطب بجد"؟؟؟" شوية و الكل لفلها ببطء وعينيهم مبرقة و البت رجعت خطوتين لورا استعدادا للجري ..و فجأة انطلقت زغروتة مدوية كان مصدرها -طبعا- مدام سندس..ماهي مش خسرانة حاجة... و بعد ماانطلقت مدام سندس وخدت البت بالحضن و احنا بصينا لبعض على أساسا ان منظرنا هيبقى مش لطيف لو مارحناش و هنيناها دلوقت..راحت كل واحدة فينا مطلعة من شنطتها الإبتسامة اللي شايلاه اللمناسبات اللي زي دي-حلوة الحتة دي مش دي الإستعارة المكنية بتاعت النحو زمان؟-والكل راح و هو عاصر على نفسه 12 كيلو لمون عشان نهني و نبارك بالمناسبةالسعيدة..قال سعيدة قال
و البت عماله كل شوية ترفعلنا ايديها في وشنا كأنها نفسها تحط صابعها في عيننا..خلاص خلاص شفنا يا امي خلاص ..مش كده يعني مانتيش اول واحدة تتخطبي
طبعا بعد موجة التهاني اللي جايةمن..القلب طبعا.
.عدى اليوم و كأننا في فيلم من أفلام الزميل الراحل شارلي شابلين..فيلم صاااامت مافيش غير نهى عماله توشوش مدام سندس و يضحكوا و يرجعوايتوشوشوا و يضحكوا..آه ماهم خلاص هما الإتنين مرتبطشين زي بعض و كل واحدة ليهاراجل

..بقية الصيدلية بأه..أجاركم الله..البت سماح كل شوية تقوم تقف في الشباك نقولها مالك ترد علينا
مخنوقة ..مخنوقة مش عارفة آخد نفسي
البت نيفين -ولأول مرة في تاريخ وزارة الصحة-تتعاطف مع المرضى و تكلهم بالراحة..تقريبا قالت يمكن دعاوي المرضى اللي بيدعوها عليها لما بترمي العلاج في وشهم تكون هي السبب في وقف حالها فقالت تغير الخطة و تخليها 4-2-4 يمكن ربنا يفك النحس

البت سمر بأه هي اللي قلقتنا قوي كل شوية تروح ناحية علبة سم الفران اللي في المخزن وتبصلها بصات غريبة كده و ده اللي خلانا طول اليوم مراقبينها و عمالين نبعدها عن أي كوباية شاي بتاعتها أو بتاعة نهى و ما ارتحناش غير لما بعدت عن السم و راحت تلعبب المقص..المقص سهل ..هتعور حاجة هنقدر نلمها ..لكن سم الفران ده نعمل فيه ايه؟
أنا عن نفسي كنت فرحانة...آه فرحانة فيه حاجة؟؟...البت صحيح سهنة و غلاوية و سماوية و خبيثة ..بس زميلة كفاح يعني.
و صحيح انا بقيت باعتبر أي حالة خطوبة او جواز على سطح كوكب الأرض إهانة شخصية في حقي..بس خلاص بأه يمكن تكون اول الطابور و الكل يكر وراها.

وصحيح احنا قلنا كده لما مدام سندس اتجوزت من 4 سنين..لكن يمكن كل 4 سنين واحدة..بالمعدلده هنحتاااااج
"4*13"
يعني.... 52 سنة على مانخلص لدستة البنات اللي في الصيدلية ..لكن برضه أهو يبقى فيه أمل

المدير العام 868 23/05/2009

عدى اليوم اللي كان اطول يوم في تاريخ البشرية و كل شوية ترميلنا فيه معلومة.
.أصل حسام..ده يبقى اسم المأسوف على شبابه
أصل في المستشفى بتاعته..يعني دكتور
أصل مامته الله يرحمها..و كمان مالكيش حماة ..يابنت المحظوظة

و فجاة في آخر اليوم تلتفتلنا بكل بجاحة قال و تقولنا

عن إذنكوا بأه يا جماعة أصل حسام هيجييوصلني بالعربية بتاعته

كام نظرة من تحت لتحت على 3-4 أصوات لمصمصة شفايف انطلقت من انحاء الصيدلية و راحت مكملة الجملة

ماتيجي يا مدام سندس نوصلك فيسكتنا

طبعا ماهي دي المضمونة بقيتنا خطر على المحروس...

نزلت الهانم جري واحنا وراها بنتدألج علسلم و بنوقع كل حاجة في طريقنا المرضى و الموظفين حتى الشجر البلاستيك اللي قدام أوضة المدير ..عشان نلحق نتفرج ع المحروس و على عربيته

الواد مش وحش ..شغال يعني..هو صحيح رفع القلم الرصاص و كل شوية يلحق البنطلون قبل مايقع منه و ودانة واضح انهم واخدين موقف شخصي من بعض أو محترمين دماغه جدا لدرجة انهم واقفين الوقفة السودة دي..لكن خلقت ربنا يعني
صحيح لابس نضارة كعب شفشق مش كعب كوباية و كبيرة لدرجة انها مش بس بتعالج نظرة دي أكيد كمان بتعالج حواجبة و خدوده
لكن راجل ..هو حد لاقي رجالة محترمة اليومين دول
العربية صحيح مش عربية 16-اللي هي 4*4 بسانا باحب أختصر-لكن عربية فخمة برضه 128 حمرا موديل 79..و البنت قعدت جنبه فيالعربية ولا كإنها قاعدة جنب ابن رئيس مراجيح مولد النبي و بصتلنا بصه كلها غل وتشفي و مدام سندس ركبت وراها..الهي يشوفك الباشمهندس الشافعي و يطين عيشتك يارب

أما روحت البيت و حكيت لماما بصت للتليفون و هي بتفكر و مدت إيديها و بدأت تطلب في رقم أنا حافظاه كويس قوي..رقم طنط حشرية

مديت ايدي و وقفتها قبل ماتكمل و بصينا في عينين بعض و انا باقولها بعمق و تأثر

لا يا ماما...لأ.. لسه ماوصلتش للدرجة دي

هههههههههههههههههههههههههههههه

عضو مميز 58 27/05/2009

هههههههههههه تسلمى ياقمر جميلة اوى ياتوبة

عضوه ذهبيه 86 04/08/2009 العمر : 36

ههههههههههههههههههههههههههههههههههههههههههههههههههههههههههههههههه

جميلة اووووووووووووووووى بل اكثر من رائعة

بجد خليتينى اضحك من قلبى

عجبنى اووى وهى بتقول كل جوازة على سطح الارض اهانة شخصية ليا

وعجبنى اوووووووووى حال البنات لما عرفوا بالخطوبة

بصى الموضوع كل رووووووووووووووووووووعة

تسلمى اختى الكريمة توبة

على هذة المشاركة الاكثر من رائعة

بوركتى اختاه

8 11/08/2009

ههههههههههههههههههههههههههه

المدير العام 868 23/05/2009

بنت مصر كتب:: ههههههههههههههههههههههههههههههههههههههههههههههههههههههههههههههههه

جميلة اووووووووووووووووى بل اكثر من رائعة

بجد خليتينى اضحك من قلبى

عجبنى اووى وهى بتقول كل جوازة على سطح الارض اهانة شخصية ليا

وعجبنى اوووووووووى حال البنات لما عرفوا بالخطوبة

بصى الموضوع كل رووووووووووووووووووووعة

تسلمى اختى الكريمة توبة

على هذة المشاركة الاكثر من رائعة

بوركتى اختاه

تشرفت بمرورك

المدير العام 868 23/05/2009

miss_egypt كتب:: هههههههههههه تسلمى ياقمر جميلة اوى ياتوبة

تشرفت بمرورك انتى الاجمل

عضو جديد 16 13/08/2009 العمر : 39

ههههههههههههههههههههههههههههههههههههههه ربنا يسعد يارب والله انا ضحكت جااامد
ربنا يسعدك حبيبتى موضوع رائع تسلمى

» يوميات بنت مصريه عايزه تجوز؟بص شوف برايد بتعمل ايه
» يوميات بنت مصريه عايزه تجوز الحقووووونى البت نهى اتجوزت
» يوميات الطفل المسلــــــــــم...
» ..يوميات بنت مصرية عاوزة تتجوز
» نفسك تحفظى القرآن ؟ عايزه طريقه سهله؟ طب جربى طريقه من دول وابقى ادعيلى